Ақтөбе облысы Хромтау ауданының тұрғыны танысын бопсалап, одан 5 млн теңге алмақ болды. Видеоны таратып жіберемін деп қорқытқан күдікті 3 млн теңгені алып жатқан жерінен ұсталды, деп хабарлайды «Тілші» ҚазАқпаратқа сілтеп.
Ақтөбе облысы ПД Ұйымдасқан қылмысқа қарсы күрес басқармасының қызметкерлері бопсалап, ақша талап еткен күдіктіні ұстады. Ол танысының ар-намысы мен қадір-қасиетіне нұқсан келтіретән видео таратып жіберетінін айтып, қорқытқан.
— Жедел іс-шараларды өткізу барысында Хромтау қаласының тұрғынын ұстады. Күдікті ар-намыс пен қадір-қасиетіне нұқсан келтіретін мәліметтерді тарататынын айтып қорқытып, жергілікті тұрғыннан 5 млн теңге бопсалаған. Ол жәбірленушіден 3 млн теңге алып жатқан кезде қолға түсті. Ұсталған азаматтан полицейлер қолма-қол ақша мен ұялы телефонды тәркіледі. Бопсалау фактісі бойынша сотқа дейінгі тергеп-тексеру жүргізіліп жатыр, — деп хабарлады Ақтөбе облыстық ПД баспасөз қызметі.
Видеоға нақты не түсірілгені белгісіз. Бір анығы, бопсалаған күдікті мен жәбірленуші бір-бірін таниды. Екеуі де ер адам.