Ақтөбеде дәстүрлі «Білім келешегі: адал азамат, кәсіби маман» тақырыбындағы облыстық педагогтердің тамыз конференциясы өтті, деп хабарлайды облыстық білім басқармасының баспасөз қызметі.
Өнер орталығында өткен жиынға Ақтөбе облысының әкімі Асхат Шахаров, Қазақстан Республикасы Оқу-ағарту бірінші вице-министрі Майра Мелдебекова, Білім беру саласын тұрақты дамыту қорының төрайымы Күләш Шәмшидинова, Ы.Алтынсарин атындағы Ұлттық білім академиясының вице-президенті Анар Танирбергенова, аудан, қала әкімдері, жоғары оқу орындарының ректорлары, білім саласының ардагерлері, педагогикалық қауым өкілдері, барлығы 1200-ге жуық қатысушы жиналды.
Жиын барысында Мемлекет басшысы Қасым-Жомарт Тоқаевтың педагогтерге арнаған бейнеқұттықтауы көрсетіліп, білім саласындағы негізгі бағыттар мен алдағы оқу жылындағы басымдықтар талқыланды. ҚР Оқу-ағарту министрлігінің 2025 жылғы республикалық тамыз саммитінің қарары ұсынылды. Сондай-ақ облыстың бас мұғалімі Бұлбұл Күзембаева жаңа оқу жылының міндеттері туралы баяндама жасады.
Конференция аясында үздік ұстаздар еңбегі еленіп, бірқатар марапаттар табысталды.
Қазақстан Республикасының «Құрмет» орденімен:
Шалқар қаласының №4 орта мектебінің биология пәні мұғалімі, педагог-зерттеуші Күнжәмила Еңсепова (42 жыл еңбек өтілі);
Ақтөбе қаласының №28 орта мектебінің бастауыш сынып мұғалімі Ұлжан Құсатаева (37 жыл еңбек өтілі) марапатталды.
«Білім беру ісінің құрметті қызметкері» төсбелгісімен:
Ақтөбе қаласының Балалар шығармашылық үйінің қосымша білім беру педагогі Гүлнар Алпысбаева,
Т.Г.Шевченко атындағы орта мектебінің математика пәнінің мұғалімі Алия Саршина,
№3 Шалқар орта мектебінің бастауыш сынып мұғалімі Жаңылсын Ашықбаева,
Петропавл орта мектебінің математика пәнінің мұғалімі Лайла Бисенова,
№7 Хромтау мектеп-гимназиясының биология пәнінің мұғалімі Алтынай Жекеева марапатталды.
Сонымен қатар 26 педагог облыс әкімінің Алғыс хатымен марапатталды. «Орта білім беретін үздік ұйым» грант беру байқауының жеңімпаздары анықталып, 6 мектепке 12 және 11 миллион теңге көлеміндегі сертификаттар табыс етілді.
Бұдан бөлек, аймақтағы 9 колледжге жалпы 900 миллион теңге табысталды, бұл жастардың сапалы білім алуына және техникалық мамандықтарды игеруіне тың мүмкіндік бермек.
Конференция барысында ардагер ұстаздар мен жас мамандардың кездесуі өтіп, педагогтердің озық тәжірибелері ортаға салынды. Шара соңында қатысушыларға концерттік бағдарлама ұсынылды.