Kazakhstan Global Investment Roundtable форумы аясында Қазақстан Республикасының Ауыл шаруашылығы министрлігі мен Coca-Cola Içecek Kazakhstan Ақтөбе қаласында төртінші сусын өндіру зауытын салу туралы негіздемелік келісімге қол қойды. Қол қою рәсімі стратегиялық инвестициялық жобаларды іске асырудағы негізгі серіктес болып табылатын Kazakh Invest компаниясының қолдауымен өтті, деп хабарлайды Isker Tilshi.
Зауыттың құрылысы 2026 жылы басталмақ. Іске қосылғаннан кейін кәсіпорында өңір тұрғындары үшін 120-дан астам жұмыс орны ашылады. Жаңа зауыт экологиялық таза технологияларды қолданады және халықаралық стандарттарға сай қалдықтарды басқару жүйесін енгізеді.
Coca-Cola Içecek Kazakhstan компаниясының бас директоры Вели Динчель бұл жобаның Қазақстан нарығына компанияның ұзақ мерзімді адалдығын көрсететінін атап өтті:
«Ақтөбедегі жаңа зауыт біздің өндіріс географиямызды кеңейтіп, жаңа жұмыс орындарын ашады және өңірдің орнықты дамуына үлес қосады».
Бүгінде Coca-Cola Içecek 12 елде 36 зауытты басқарады. Қазақстанда компанияның Алматы, Астана және Шымкент қалаларында үш өндірістік кәсіпорны жұмыс істейді. Ақтөбедегі жаңа нысанның құрылысы жақында ғана іске қосылған құны 27 млрд теңге болатын Шымкенттегі зауыттан кейін қолға алынып отыр.