Полиция қатты аяз салдарынан трассада қалғандарға тәулік бойы көмек көрсетіп келеді

​23 қаңтарда түнде Ақтөбе облысында 30 градус аяз болды. Алайда, кейбір жүргізушілер құтқарушылар мен полицияның ұсыныстарын елемеді.
​
Түнде Ырғыз ауданында «Самара-Шымкент» автожолында полиция жасағы жол жиегіндегі автобусты байқаған. 82 жолаушысы бар автобус Шымкент-Уфа бағытына қарай келе жатқан. Алайда, трассада автобус істен шыққан. Полиция ТЖД қызметкерлерімен және жергілікті атқарушы органдармен бірлесіп жылыту пунктіне 84 адамды, оның ішінде 3 баланы (РФ, Өзбекстан және Тәжікстан Республикасының 82 азаматы және Қазақстан Республикасының 2 азаматы) жеткізді.
​
Сол түні Қобда ауданында Самара-Шымкент автожолында да техникалық ақауына байланысты БҚО бағытынан ОҚО қарай бара жатқан 25 шетелдік жолаушысы бар автобус тұрып қалды. Жүргізушісі мен жолаушылар жылыту пунктіне жеткізілді.
​
Қазіргі уақытта Ақтөбе облысында республикалық және облыстық маңызы бар автожолдарда әртүрлі техникалық ақауларымен 30 ауыр жүк автокөлігі және 2 автобус тұр. Полиция және жергілікті атқарушы органдар оларға жан-жақты көмек көрсетуде.
​
Полиция департаменті азаматтарды алыс сапарға шықпас бұрын ауа райы жағдайын ескеруді және синоптиктердің ұсыныстарын тыңдауға шақырады.