Хромтау тау-кен жоғары колледжінде заманауи құзырет орталығы ашылды. Бұл – тау-кен өндірісіндегі кәсіби білім беру тәсілін өзгертетін жаңа алаң. Материалдық-техникалық базаны жабдықтауға бағытталған инвестиция көлемі — 115 миллион теңгеден астам. Заманауи білім беру алаңдары барлық студенттерге қол жетімді.
Орталық екі негізгі компонентті қамтиды: VR-зертхана және тау-кен машиналары мен кешендерінің зертханасы. Заманауи технологиялардың арқасында студенттер енді шахталар мен өндірістік алаңдардағы жұмысты модельдей отырып, виртуалды шындықта кәсіби тапсырмаларды орындай алады. Кең ауқымды бағдарламалық тізімі бар VR-көзілдіріктері студенттерге оқу аудиториясынан шықпай-ақ, түрлі өндірістік процестерге енуге және кәсіби дағдыларды меңгеруге ықпал етеді.
Аталған жоба ERG компаниясының тікелей қолдауымен жүзеге асырылды. Жаңа зертханалар сегіз мамандық бойынша, соның ішінде жерасты кен орындарын игеру, жерасты құрылыстарын салу және электр жабдықтарын оқыту үшін пайдаланылады. Хромтау колледжі бірнеше ондаған жылдар бойы өндіріске мамандар даярлайтын «Қазхром» ТҰК» АҚ филиалы – Дөң тау-кен байыту комбинатының серіктесі.
– Бұл жай ғана қарыштау емес, тау-кен өндіру өнеркәсібі үшін мамандарды даярлаудағы нағыз серпіліс, — деп жобаның маңызын атап өтті колледж директоры Бағдаш Мұлдашева. – Біз ERG компаниясына колледжіміздің дамуына қосқан зор үлесі үшін алғыс білдіреміз. Енді студенттеріміз ең заманауи зертханаларда оқитын болады. Бұл оларды еңбек нарығында бәсекеге қабілетті ете түспек.
4-курс студенті Жолмұрат Бахадүр жаңа білім беру кеңістігінің бірегейлігін атап өтті: — VR-технологиялары виртуалды шындыққа еніп, күрделі процестерді тікелей кабинеттен шықпай-ақ меңгеруге мүмкіндік береді. Бұл керемет тәжірибе.
Құзырет орталығының салтанатты ашылуына ERG компаниясы мен Дөң тау-кен байыту комбинатының өкілдері, колледж басшылығы, оқытушылар мен студенттер және жергілікті билік өкілдері қатысты.
Заманауи кабинеттерді Ақтөбе облысы әкімдігімен ынтымақтастық туралы меморандум аясында ERG компаниясы жөндеп, жабдықтапп берді. Жалпы, ERG тобының кәсіпорындары орналасқан аймақтарда ERG компаниясы Альянс құрамына кіретін оқу орындарында 10 «ERG құзыреттілік орталығы» кабинетін жөндеп, жабдықтады. Бүгінде оның құрамында Топтың орналасқан аймақтарындағы 23 колледж және 3 ЖОО бар. Тек 2024 жылдың өзінде ERG колледждерді жабдықтауға 600 миллион теңгеден астам қаражат бөлді. Бұдан бөлек, ERG мен колледж альянстың үздік педагогтары мен студенттері Қытай және Германия елдеріне тағылымдамадан өтуге барады. 2024 жылы ERG колледждердің рекордтық 737 түлегін еуразиялықтар қатарына қабылдады.
ERG кәсіпорындары барлық қызмет барысында Қазақстанның әлеуметтік-экономикалық дамуына айтарлықтай үлес қосып келеді. Бүгінгі таңда ERG-дің туған қалалары орналасқан аймақтардағы әлеуметтік инвестициялардың жалпы көлемі шамамен 400 млрд. теңгені құрайды.