45 жастағы кәсіпкер әйелге қатысты қылмыстық іс бойынша 22 эпизод қаралды, деп хабарлайды «Диапазон».
Айыптау қорытындысына сәйкес, оның бутигіне (Смағұлов көшесі) келген клиенттер каталог арқылы асүй гарнитурлары мен жатын бөлмеге арналған жиһазды таңдап, ақысын төлеген, бірақ тауарды алмаған және ақшаларын қайтара алмаған.
Зардап шеккендердің арасында Бестамақ ауылының тұрғыны да бар: ол қызының тойына сыйға тарту үшін жатын гарнитурына 610 мың теңге төлеген.
– Сатушы жиһазды қызымның тойына дейін сақтап беруді ұсынды, бұл маған ыңғайлы көрінді, өйткені басқа дүкендерде тауарды тек бір ай ғана сақтайтын. Жиһазды жеткізу күні сатушы қойма суға кетіп, жиһаз бүлінді деді. Бір аптадан кейін жаңа жиһаз жеткіземін, қазір шекарада тұр деп уәде берді. Бірақ кейін хабарласудан қалды. Содан соң мен дүкенге өзім барып едім, ондағы қызметкерлер мені алдап кеткенін айтып, полицияға жүгінуімді ұсынды, – деді сотта зардап шегуші.
Тағы 21 адамның оқиғасы да осындай. Олар жаңа жиһазға 610 мыңнан миллион теңгеге дейін ақша төлеген, кейбірі қолма-қол, кейбірі бөліп төлеу арқылы, бірақ уәде етілген жиһаз уақытында жеткізілмеген. Сатушы оларға да қойма суға кеткенін, жиһаз бүлінгенін айтып, кейінірек жеткіземін деп уәде берген, ақыры бәрі сотқа ұласқан.
Сотта айыпталушы өзін 2016 жылдан бері жиһаз саудасымен айналысатынын, ресейлік фабрикалардан тауарды қолма-қол ақшамен сатып алатынын, жеткізуді жеке жүргізушілер арқылы іске асыратынын айтты. 22 зардап шегушіге қатысты оқиғаны форс-мажор деп сипаттады. Оның сөзінше, сатылым маусымында фабрика тауарды уақытында дайындап үлгермеген, кейін жиһаз Ақтөбеге жеткізу кезінде бүлініп, жүргізуші шығынды өтемеген. Салдарынан ақшасыз қалып, бизнесті жалғастыра алмай, дүкенін жапқан. Ол өзінің алаяқтық жасамағанын айтып, ақтауын сұрады.
Сотта куәгер ретінде сұралған жүргізуші де болды. Ол айыпталушыға Ресейден 16 жиһаз комплектісін әкелгенін, жол апатына түсіп, жиһаз бүлінгенін, оны кері қабылдамағанын, ақыры Чешенстанда арзанға сатып жібергенін айтты. Ол тапсырыс берушіге 6 млн 800 мың теңге қарыз болып қалғанын жеткізді. Алайда сот бұл жүргізушінің сөзіне күмәнмен қарап, себебі ол ешқандай дәлел келтірмеген, тіпті бүлінген жиһаздың суретін де түсірмеген.
Сот айыпталушының алаяқтық ниеті болғанын анықтады. Себебі ол келісімшарт жасасқан сәтте-ақ өз міндеттемелерін орындай алмайтынын білген, тауар қоймада тұр деп алдаған, тіпті жоқ жиһазға жеңілдіктер ұсынған.
Нәтижесінде сот айыпталушыны алаяқтық жасағаны үшін кінәлі деп танып, 5 жылға бас бостандығынан айырды. Үкім шыққаннан кейін ол бірден қамауға алынды. Сонымен қатар, сотталған әйел зардап шеккендерге келтірген шығынды өтеуге міндеттелді.