«Дүйсенбіде Ресей жөнінде маңызды мәлімдеме жасаймын деген ойдамын», – деді АҚШ президенті Дональд Трамп 10 шілде күні NBC телеарнасына телефонмен сұхбат берген кезде. Бұл туралы Азаттық жазады.
Сұхбат барысында президент Трамп Ресейдің Украинаны нысанаға алған жаппай шабуылдары жалғасып жатқаны үшін Ресей президенті Владимир Путинді сынға алды.
Трамп Ресейдің энергетика ресурстарын сатып алып отырған мемлекеттерге қарсы санкциялар енгізуді көздейтін заң жобасын Конгрестің мақұлдағанын күтетінін айтты.
«Олар өте ауқымды әрі ауыр заң жобасын қабылдайды, алайда оны іске асыру не іске асырмау құқығы президенттің өзінде қалады», – деді АҚШ президенті.
Бұған қоса президент Трамп НАТО елдерімен маңызды келісім жасалғанын хабарлады. Ол келісім аясында альянс елдеріне Украина армиясына жеткізу үшін америкалық қару-жарақты сатып алуға мүмкіндік берілемек.
«Біз НАТО-ға қару жөнелтеміз, ал НАТО бұл қаруды әрі қарай жеткізіп, оның ақысын төлейді», – деді Трамп.
Сарапшылардың пікірінше, АҚШ-тың Ресейге қарсы энергетикалық санкциялары Қазақстан үшін қосымша тәуекелдер тудыруы мүмкін. Қазақстанның мұнай-газ экспорты Ресейдің инфрақұрылымына тәуелді болғандықтан, бұл шаралар елдің энергетика секторына жанама түрде әсер етуі ықтимал. Сондықтан Қазақстан билігі геосаяси тәуекелдерге ерекше назар аударып, экспорттық бағыттар мен әріптестерді әртараптандыруға тырысады.