Қазақстан Ұлттық банкі банктердің міндетті резерв мөлшерін көбейтті. Бұл қадам елдегі артық ақшаны азайтып, бағаның шамадан тыс өсуін тежеу үшін жасалды, деп хабарлайды «Тілші».
Енді банктер:
- теңгемен алған қаражатының 3,5% және 5%-ын,
- шетел валютасымен алған қаражатының 10% және 15%-ын
резервте ұстауға міндетті болады.
Бұрын бұл көрсеткіштер әлдеқайда төмен еді – теңгеде 1,3%, валютада 2,5%. Жаңа талаптар бірден емес, бір жыл ішінде кезең-кезеңімен енгізіледі.
Ұлттық банк мұндай өзгерістің мақсатын былай түсіндірді:
«Қабылданған шаралар артық ақша айналымын азайтуға, ақша-несие саясатының әсерін күшейтуге және инфляциямен күресті тиімді етуге мүмкіндік береді. Басты мақсатымыз – инфляцияны 5%-ға дейін төмендету. Тұрақты әрі төмен инфляция – теңгенің сатып алу қабілетін, халықтың табысын сақтаудың және экономиканың тұрақты дамуының кепілі», – делінген ресми мәлімдемеде.
Мамандардың айтуынша, бұл өзгеріс банктердің жұмысын тұрақтандырып қана қоймай, қарапайым халықтың да қаржысын қорғауға ықпал етеді.