Желіде Ақтөбе қаласының әкімі Азамат Бекет пен жергілікті белсенді Ерәділ Үббиниязов арасындағы әңгіме тарады. Белсенді қаладағы сапасыз жол жөндеу жұмыстарына қатысты сын айтқан соң, әкім оған «Тоқаевпен істесеңші» деп жауап берген, деп хабарлайды Stan.kz.
Ерәділ Үббиниязов қаладағы жол жағдайын сынға алып, президенттен көмек сұрағанын айтады. Оның сөзінше, әкім оған жолды сынағаны үшін ескерту жасап, қоңырау шалған.
Желіде тараған видеода белсенді «Енді мен не істейін?» деп сұраған кезде, әкім оның айтқандарына жауап береді:
«Онда тікелей сол республикамен істесеңші. Тоқаевпен істесеңші онда. Егер сен сондай ойда болсаң… Сені түсінбедім. Жарайды, Instagram, Facebook желілеріне шығардың. Неге Ақорданы белгіледің?».
Белсенді бұл оқиға қалай болғанын өз пікірінде былайша жеткізді:
— Ақтөбеде жаңбыр жауып тұрған күні жолға асфальт төсеп жатқанын көрдім. Жанына барып, жұмысты тоқтатуын сұрадым. Видеоға түсіріп, парақшама жарияладым. Сол уақытта көлігіме жеткенше, қала әкімі хабарласып, маған «Тоқаевпен жұмыс істе» деген сөздер айтты. Мен тек халықтың жағдайын жақсартуды көздеп, мәселені заң аясында шешу қажеттігін айтып едім. Бұл мәселені көтергенде, әкім президентпен тікелей байланысу керек деді. Мұндай жауапты естігенде, әкімдердің халықпен жұмыс істеу тәсіліне күмәндандым, – дейді Ерәділ Үббиниязов.
Белсенді eOtinish платформасы арқылы барлық тиісті мекемелерге шағым түсіргенін мәлімдеді.
Ақтөбе әкімдігі бұл жағдайға қатысты түсіндірме жариялап, онда әкім Ерәділ Үббиниязовты 2025 жылдың ақпан айында жеке қабылдағаны жазылған. Кездесу барысында ортақ қалалық мәселелерді шешуге бірге жұмыс істеуге келіскендері атап өтілген.
“Ерәділ Үббиниязов бұған дейін қалалық қоғамдық кеңестің құрамында болған және әкіммен жеке таныс. Оның көтерген проблемалық тақырыптары бірнеше рет жұмыс тәртібімен шешіліп, қала әкімімен тұрақты байланыс арқылы қаралып отырды. Алдыңғы жеке қабылдауда ортақ қалалық мәселелерді жүйелі түрде салалық бөлімдердің басшыларына, қажет болған жағдайда тікелей әкімге жеткізу жөнінде өзара келісімге қол жеткізілген еді», – делінген әкімдік хабарламасында.
Сонымен қатар әкімдік олардың телефон әңгімесінің толық нұсқасы контексттен тыс таратылғанын, бұл жағдайдың екіұшты түсінілуі мүмкін екенін атап өтті.
Ақтөбе әкімдігі тұрғындармен жұмыс жасау ең алдымен жергілікті деңгейде, барлық тараптың белсенді қатысуымен шешілуі тиіс екенін мәлімдеді. Олар орталық органдармен өзара байланыс үнемі жүргізілетінін және қажеттілік туындаған жағдайда белгіленген тәртіппен іске асатынын айтты.