Қазақстанда банк шоттары мен ақша аударымдарын тексерудің жаңа тәртібі дайындалып жатыр, деп хабарлайды Tengrinews.kz.
Қаржы министрлігі жария талқылауға шығарған бұйрық жобасында активтері мен міндеттемелері жөнінде декларация тапсыруға міндетті азаматтардың банк шоттары туралы мәлімет беру тәртібі нақтыланған.
Не өзгереді?
Жобаға сәйкес, екінші деңгейлі банктер салық органдарына төмендегі мәліметтерді жіберуге міндеттеледі:
есепшот нөмірлері мен ондағы қалдық қаражат туралы;
- жыл ішіндегі ақша қозғалысы туралы;
- берілген несиелер, олардың қайтарылуы және пайыздық мөлшері туралы;
- құны 20 мың АЕК-тен (2025 жылы – 73 млн теңгеден жоғары) мүлік сатып алу кезінде жасалған төлемдер туралы.
Неліктен енгізіледі?
Министрліктің түсіндіруінше, өзгерістің мақсаты – жалпыға бірдей декларация аясында азаматтардың табысы мен мүлкіне бақылауды күшейту. Бұл қадам салық органдарына ірі мәмілелерді қашықтан бақылауға және оларды декларацияда көрсетілген деректермен салыстыруға мүмкіндік береді. Нәтижесінде салық жүйесі әділ болады, бюджет түсімі көбейеді және көлеңкелі экономика қысқарады деп күтілуде.
Бұрын қалай еді?
Бұрын банктер салық органдарына тек есепшот пен несиелер туралы жалпы ақпарат қана беретін. Енді бұл тізім жаңа Салық кодексіне сәйкес толықтырылып, нақтыланып отыр. Құжатта азаматтарға қосымша қауіп төнбейтіні, тек бақылаудың ашықтығы арта түсетіні жазылған.
Жоба қазір «Ашық НҚА» порталында қоғам талқысына ұсынылған.