Хромтау қаласында еліміздің өнеркәсібін дамытуға сүбелі үлес қосып жүрген ERG құрамындағы «Қазхром» ТҰК» АҚ-на қарасты Дөң тау-кен байыту комбинатының еңбеккерлеріне жоғары мемлекеттік марапаттар табысталды. Салтанатты шара мерекелік концертпен жалғасып, сахнада кәсіпорын қызметкерлері мен қазақстандық эстрада жұлдыздары өнер көрсетті.
Шахтерлер қаласында еңбек адамын ұлықтау дәстүрге айналған. «Жұмысшы мамандықтар жылы» аясында шахтерлермен қатар диспетчерлер, жүргізушілер, фабрика жұмысшылары секілді әртүрлі сала өкілдері де марапатталды.
Ақтөбе облысының әкімі Асхат Шахаров еңбек озаттарына «Құрмет» орденін, III дәрежелі «Еңбек даңқы» орденін, «Ерен еңбегі үшін» медалін, сондай-ақ «Қазақстанның еңбек сіңірген кеншісі» төсбелгісін табыстады.
– Мемлекет басшысы адал әрі табанды еңбегімен табысқа жеткен адамдар әрқашан құрметке лайық екенін атап өтіп, биылғы жылды «Жұмысшы мамандықтар жылы» деп жариялады. Жұмысшы мамандығының қоғамдағы беделін көтеру, еңбек адамына лайықты ілтипат білдіру және кәсіби шеберлікті жетілдіру әрдайым назарымызда. Қазіргі таңда осы сала облысымыздың өнеркәсіптік өндірісінің шамамен 53%-ын құрайды. Өндірістік секторда металлургиялық рудаларды өндірудің маңызы ерекше, ол барлық өндірістік өнімінің 25%-ын құрайды. Бүгінде 11 мыңға жуық қызмет ететін еңбек адамдары біздің ірі кәсіпорындардың тұрақты жұмысын қамтамасыз етіп келеді, – деді өңір басшысы Асхат Шахаров.
Өндірістің өркендеуіне сүбелі үлесі қосқан қызметкерлер корпоративтік марапаттарға да ие болды. ERG Директорлар кеңесінің төрағасы, бас атқарушы директоры Шухрат Ибрагимов әріптестерін құттықтап, еңбектері үшін алғыс білдірді.
– Соңғы жылдары біз бірлесіп үлкен нәтижелерге жеттік, – деді ол. – ERG Green фабрикасын іске қостық – бұл әлемде тұңғыш рет хром қалдықтарын гравитациялық әдіспен өңдейтін бірегей жоба. Бұл – тек технологиялық жетістік қана емес, аймақтың экологиялық болашағына әрі саланың тұрақты дамуына қосқан зор үлес. Былтыр «Болашақ» шахтасы пайдалануға берілді. Ол – әлемдегі ең терең шахталардың бірі, қуаты жылына 7,5 млн тонна. 2024 жылы хром кенінің өндірісі 6 млн тоннадан асып, ферроқорытпа өндірісі тарихи ең жоғары көрсеткіш – 1,864 млн тоннаға жетті. Мұның барлығы – сіздердің қажырлы еңбектеріңіздің арқасы. Әсіресе Хромтау тұрғындарына – кеншілердің отбасыларына алғыс айтамын. Сіздердің қолдауларыңыз бізге күш-қуат береді.
Мерекелік кеште Роза Рымбаева, «Ұлытау» тобы, Қазбек Құрайыш, Айқын Төлепберген, Kalifarniya өнер көрсетті. Дөң ТКБК «Молодежная» шахтасының ұңғылаушысы Нұрболат Қазақбаев «Ұлытау» тобымен бірге домбыра тартып, тау-кен инженері Гүлзат Джанадилова Қазбек Құрайышпен қосылып, ән шырқады. Сонымен қатар «Алтын дән» ансамблінің әншілері де жұлдыздармен бір сахнаға шықты. Шара лазерлік шоу мен мерекелік отшашуға ұласты.
– Еңбегіміздің бағаланғанына қуаныштымын. Бұл – менің ғана емес, бүкіл бригадамның еңбегі, – дейді Дөң тау-кен байыту комбинатының Қазақстан Тәуелсіздігінің 10 жылдығы атындағы шахтасында жұмыс істейтін ұңғылаушылардың бригадирі, «Кенші даңқы» төсбелгінің толық кавалері Исмағұл Бажақанов. – Кәсіби мереке қарсаңында осындай жоғары марапат алу – екі есе қуаныш. Әрқайсымыз өз ісімізге жан-тәнімізді саламыз. Нағыз шахтер көп сөйлей бермейді, бірақ біздің қуанышымыз шын жүректен. Компанияға, әріптестеріме, отбасымa ризамын. Баршаңызды мерекемен құттықтаймын, табыс, денсаулық, ең бастысы – қауіпсіз еңбек тілеймін!
Мерекеде шахтерлер туралы арнайы фильм көрсетіліп, «Қазхромның» өндірістік жетістіктері мен әлеуметтік жобалары таныстырылды. Биыл Хромтауда жаңа Мәдениет орталығы пайдалануға берілді. Компанияның қолдауымен мектептер жөнделіп, аула-аймақтар абаттандырылып, инженерлік желілер жаңартылып жатыр. 2001 жылдан бері ERG-дің Қазақстанға құйған әлеуметтік инвестициясының жалпы көлемі 321 млрд теңгеден асты.