Шалқар қаласында кәмелетке толмаған жасөспірім пышақ жарақатын алды. Оқиғаға байланысты полиция сотқа дейінгі тергеп-тексеруді бастады, деп хабарлайды «Тілші».
Жарақат алған жас Шалқар аудандық ауруханасына жеткізіліп, оған қажетті медициналық көмек көрсетілді. Полиция күдіктіні анықтап, бөлімшеге жеткізгенін хабарлады.
Қазіргі уақытта оқиғаның барлық мән-жайын анықтауға бағытталған тергеу амалдары жүргізіліп жатыр. Күдікті жасөспірім профилактикалық есепке қойылып, оның ісі аудан әкімдігі жанындағы кәмелетке толмағандар ісі жөніндегі комиссияда қаралатын болады.
Сонымен қатар, полиция күдіктінің ата-анасына қатысты да шара қолданылатынын мәлімдеді. Баланы тәрбиелеу жөніндегі міндеттерін тиісінше орындамағаны үшін олар әкімшілік жауапкершілікке тартылуы мүмкін.