Ақтөбе облысында биыл білім беру, денсаулық сақтау және спорт салаларын қамтитын 87 әлеуметтік нысанның құрылысы жүріп жатыр. Бұл мақсатқа Ұлттық қор мен бюджеттен жалпы сомасы 93 миллиард теңге бөлінген. Дегенмен, кейбір құрылыстар әлі аяқталмаған. Облыс әкімі Асхат Шахаров мердігерлерге жұмыс қарқынын күшейтуді тапсырып, кез келген олқылық үшін «жеке жауапкершілік» болатынын қатаң ескертті, деп хабарлайды «Тілші».
Облыстық құрылыс басқармасының басшысы Ержан Мұздыбаевтың айтуынша, 87 нысанның 35-і қазірдің өзінде пайдалануға берілген. Жыл соңына дейін тағы 33 нысан тапсырылуы тиіс. Қалған 19 нысанның құрылысы келесі жылға өтеді.
Басты назар су тасқынынан зардап шеккен ғимараттарды қалпына келтіруге бөлінген. Бұл мақсатқа екі жылда 6 млрд теңге қаралған. Әңгіме үш балабақша мен екі мектеп туралы. Оның үшеуі қазірдің өзінде тапсырылған. Жыл соңына дейін Ойыл ауылындағы 320 орындық мектеп пен 150 орындық балабақша пайдалануға беріледі деп жоспарланған.
Сонымен қатар, облыста 6 «проблемалық» нысанның құрылысы әлі жүріп жатыр. Олардың қатарында Әйтеке би ауылындағы дене шынықтыру кешені, Ақтөбедегі «Шилісай-1» және «Алтын орда» шағынаудандарындағы нысандар, сондай-ақ бірнеше ауылдағы мектептер бар. Шенеуніктер бұл нысандардың барлығы биыл аяқталатынын айтты, тек Қандыағаш қаласындағы «Самал» шағынауданындағы мектептің құрылысы 2026 жылы ғана бітеді.
Бұдан бөлек, облыс орталығында жаңа Драма театры, үлкен футбол стадионы және «еліміздегі ең ірі спорт кешенінің» құрылысы басталған.
Алайда, облыс әкімі Асхат Шахаров құрылыс сапасы мен мерзімдерін қатаң бақылауды күшейту қажеттігін баса айтты.
«Мердігерлер мен жауапты органдар жұмыс қарқынын күшейтіп, өз міндеттемелерін бұлжытпай орындауы тиіс. Білім, денсаулық сақтау және спорт басқармалары жаңа нысандарды пайдалануға беру бойынша дайындықты жеделдетуі керек. Жабдық сатып алып, кадр мәселесін шешіп, құжаттарды дайындаған жөн. Барлық жұмыс мерзімінен бұрын аяқталуы қажет. Кез келген бұзушылық жеке жауапкершілік тұрғысынан қарастырылатын болады», – деп түйіндеді облыс әкімі.