Ақтөбе облысының Шалқар ауданында қуанышты жағдай. Бершүгір және Кішіқұм ауылдық округтерінде заманауи медициналық пункттер ел игілігіне берілді. Әлеуметтік нысандар мемлекетке қайтарылған заңсыз активтер мен облыстық бюджет есебінен бой көтерді, деп хабарлайды «Тілші».
Бұл нысандар «Ауылда денсаулық сақтауды жаңғырту» ұлттық жобасы аясында салынды. Енді Сарысай және Шоқысу ауылының тұрғындары алғашқы медициналық көмек алу үшін аудан орталығына сабылмайтын болды.
Құрылысқа қанша қаражат кетті?
Жаңа ғимараттар заманауи құрал-жабдықтармен толық қамтылған.
Шоқысу ауылы:
- Бір ауысымда 20 адамды қабылдай алады.
- Жалпы құны – 126,5 млн теңге.
- Оның 74,5 млн теңгесі – Арнаулы мемлекеттік қордан (қайтарылған активтер), ал 46,1 млн теңгесі облыстық бюджеттен бөлінді.
Сарысай ауылы:
- Бір ауысымда 25 адамға қызмет көрсетеді.
- Жалпы құны – 133,8 млн теңге.
- Құрылысқа қажетті қаражаттың басым бөлігін, яғни 97,4 млн теңгесін Арнаулы мемлекеттік қор көтерді.
Халықтың қуанышы
Ауыл тұрғындары үшін бұл – көптен күткен жаңалық. Сарысай ауылының тұрғыны Дариға Әлмұратова өз лебізін білдірді.
«Ауылымызда үлкен амбулатория ашылып, қуанып жатырмыз. Осындай мүмкіндік жасаған Мемлекет басшысына алғысымыз шексіз. Сондай-ақ, ауылымызда 40 жыл тапжылмай еңбек етіп келе жатқан Рая Ақжапарова деген ақ халатты абзал жан бар. Жаңа ғимарат сол кісінің еңбегіне берілген баға деп білеміз», – деді ауыл тұрғыны.
Инклюзивті орта және сапа
Ашылу салтанатына қатысқан аудан әкімі Жанболат Жидеханов нысандардың маңыздылығына тоқталды. Айта кетейік, құрылыс барысында инклюзивтілік талаптары қатаң сақталған: ғимараттар мүмкіндігі шектеулі жандар үшін толықтай қолжетімді.
Ақтөбедегі жалпы көрсеткіш
Ақтөбе облысында қайтарылған активтер есебінен құрылған Арнаулы мемлекеттік қор қаржысына ауылдық денсаулық сақтау саласы бойынша барлығы 11 жоба жүзеге асып жатыр. Бүгінгі таңда 7 нысан халыққа қызмет көрсетуді бастады. Қалған 4 нысанның құрылысы аяқталуға жақын.