АҚШ президенті Дональд Трамп 66 халықаралық ұйым, агенттік және комиссия құрамынан шығу туралы жарлыққа қол қойды. Бұл туралы Bild басылымына сілтеме жасаған «Тілші» хабарлады.
АҚШ Мемлекеттік департаментінің ресми мәлімдемесінде Трамп әкімшілігі аталған институттарды «артық, нашар басқарылатын, қажетсіз, ысырапшыл әрі тиімсіз» деп бағалағаны айтылған.
Сонымен қатар бұл құрылымдардың кейбірі «жеке мүдделерді көздейтін адамдардың ықпалына түскен» немесе «АҚШ-тың егемендігіне, бостандықтарына және ұлттық әл-ауқатына қауіп төндіретін көзқарастарды ұстанатындармен байланысты» деп көрсетілген.
Шешім аясында, атап айтқанда, БҰҰ-ның Халық саны қоры, климат мәселелерімен және еңбек құқығымен айналысатын бірқатар халықаралық органдар қамтылған. АҚШ билігінің пікірінше, бұл ұйымдар «woke-күн тәртібін» алға тартады немесе елдің ұлттық мүдделері мен егемендігіне қайшы тақырыптарға басымдық береді.
Бұған дейін Дональд Трамп әкімшілігі Дүниежүзілік денсаулық сақтау ұйымын (ДДСҰ), БҰҰ-ның Палестина босқындарына көмек көрсету агенттігін (UNRWA), БҰҰ Адам құқықтары жөніндегі кеңесін және ЮНЕСКО-ны қаржыландыруды тоқтатқан болатын.
Айта кетейік, осы шешім жарияланардан шамамен бір жарым сағат бұрын Дональд Трамп Truth Social әлеуметтік желісінде 2027 жылға қарай АҚШ-тың қорғаныс шығындарын 1,5 триллион долларға дейін күрт арттыруды жоспарлап отырғанын мәлімдеді. Ол бұл қадамды «тынышсыз әрі қауіпті кезеңмен» түсіндірді.