Мемлекет басшысы Қасым-Жомарт Тоқаев Конституциялық комиссияның басшылығын қабылдап, елдің бас құжатының қорытынды жобасын мақұлдады. Президент таяу арада жаңа Конституцияны қабылдау бойынша республикалық референдум өткізу туралы Жарлыққа қол қоятынын мәлімдеді, деп хабарлайды «Тілші» Ақорданың баспасөз қызметіне сілтеме жасап.
Бұл кездесуде Конституциялық сот төрағасы Эльвира Әзімова, Мемлекеттік кеңесші Ерлан Қарин және Президент көмекшісі Ержан Жиенбаев атқарылған ауқымды жұмыстың қорытындысын баяндады.
Эльвира Әзімова комиссияның он екі отырысының нәтижесінде жаңа Ата Заңның дайын болғанын жеткізді. Комиссия мүшелері құжатты әзірлеу барысында былтырғы қазан айынан бастап eGov және e-Otinish порталдары арқылы түскен мыңдаған азамат пен сарапшының ұсыныстарын негізге алды. Сонымен қатар, жобаның ішіне Парламенттік реформа жөніндегі жұмыс тобы жинақтаған маңызды тәсілдер де енді. Комиссия бұл жобаны жалпыхалықтық талқылауға, яғни референдумға шығаруды ұсынды.
Қасым-Жомарт Тоқаев комиссияның атқарған жұмысына жоғары баға беріп, оның кәсібилігіне ризашылығын білдірді. Президенттің пайымдауы бойынша, бұл жоба мемлекеттің институционалдық негізін трансформациялау үдерісінің аяқталғанын және елдің мүлде жаңа конституциялық үлгіге көшетінін айқындайды. Мемлекет басшысы жаңа Ата Заңның қоғамдағы өзекті құндылықтарды бекітіп, Қазақстанның прогрессивті дамуына жол ашатынын ерекше атап өтті.
Президент комиссия жұмысының ашықтығына, атап айтқанда талқылаулардың тікелей эфирде өтуіне оң баға берді. Ол мыңдаған азаматтың жобаны әзірлеуге қатысуы «Халық үніне құлақ асатын мемлекет» тұжырымдамасының нақты нәтижесі екенін айтты. Осылайша, жаңа Конституция шынайы халықтық сипатқа ие болып отыр. Енді ел тағдырын айқындайтын құжатты қабылдау мәселесі референдум арқылы шешіледі.