Ақтөбе облысында 23 жастағы мұғалімнің қайтыс болуына байланысты сотқа дейінгі тергеу басталды. Бұл туралы «Ақ Жайық» басылымы хабарлады.
Қазіргі уақытта Темір аудандық полиция бөлімі тексеру жүргізіп жатыр. Құқық қорғау органдары оқиғаның барлық мән-жайын анықтауда.
Алдын ала мәліметтерге сәйкес, жас педагогтың өлімі өз-өзіне қол жұмсау дерегі бойынша қарастырылуда. Алайда оны мұндай қадамға итермелеуі мүмкін себептер ресми түрде жарияланған жоқ.
Марқұм Темір ауданы Алтықарасу ауылдық округіне қарасты Еңбекшіл мектебінде тарих пәнінің мұғалімі болып жұмыс істеген. Әріптестерінің айтуынша, ол өз міндетін жауапкершілікпен атқарып, жақында ғана ашық сабақ өткізген.
Полиция өкілдері сотқа дейінгі тергеудің басталғанын растады. Тексеру нәтижесі бойынша тиісті құқықтық баға берілетін болады.