Ақтөбелік жас дарын, №51 гимназия оқушысы Мират Сагинбаев қала тұрғындары мен қонақтарына Ақтөбенің көрікті жерлерін таныстыру мақсатында «Walking in Aktobe» атты мобильді қосымшаны әзірледі. Бұл ерекше жоба MIT App Inventor визуальды программалау ортасында жасалып, аймақтың туристік орындары туралы толық ақпарат беруді, сондай-ақ қала бойынша еркін түрде маршрут құру мүмкіндігін ұсынады.
«Walking in Aktobe» қосымшасы туристерге нұсқаушысыз саяхат жасауға мүмкіндік береді.
Пайдаланушылар қала ішіндегі тарихи, мәдени және табиғи көрікті жерлерді оңай таба алады. Бұл қосымша арқылы туристер тек бағыт алып қана қоймай, өңірдің бай тарихы мен мәдениеті жайлы мол мағлұмат ала алады.
Автордың айтуынша, жоба болашақта Қазақстандағы туризмнің дамуына ықпал етіп, экономикалық өсімге оң әсерін тигізуі мүмкін.
Қосымша авторы Мират алдағы уақытта жобасын жетілдіріп, жаңа мүмкіндіктер қосуды жоспарлап отыр. «Walking in Aktobe» қосымшасы жақын арада туристердің өз бетімен саяхаттауына арналған танымал құралға айналмақ.
Сонымен қатар, пайдаланушылар бұл қосымшаны Play Market және App Store дүкендерінен тегін жүктей алады. Бұл қосымшалар Ақтөбенің туристік тартымдылығын арттырып, қала қонақтарына қолжетімді және қызықты саяхат жасауға жаңа мүмкіндіктер ұсынбақ.