Шымкенттіктер үшін елеулі орынға айналған алғашқы «Мадлен» кофеханасы 1997 жылы ашылған болатын. Уақыт өте келе тұрғындар жақсы көріп кеткен бұл орын бүтін бір кондитерлік желіге айналды. Енді «Мадленнің» жаңа иесі — HoReCa саласында Sandyq мейрамханалары мен Tary этнокофеханаларымен танымал ірі холдинг Sandyq Group болды, деп хабарлайды forbes.kz.
Бүгінде «Мадлен» — бұл жай ғана жайлы кофеханалар мен балалық шақтан таныс десерттер емес. Бұл 18 кофеханасы, 600-ден астам қызметкері, 400 тағам атауы мен 150 түрлі кондитерлік өнімдері бар ауқымды бизнес.
Sandyq Group бұған дейін табысты мейрамхана жобаларын басқарып қана қоймай, гастрономия арқылы мәдени бірегейлікті сақтай алатын компания ретінде өзін танытқан. Олардың Sandyq мейрамханалары мен Tary кофеханалары ұлттық тағамдарды насихаттап, ұмыт болған рецептерді қайта жаңғыртып, қазақтың қонақжайлылық дәстүрлерін дамытып жүр.
Қазіргі уақытта желі Астана, Шымкент, Алматы, Түркістан, Мәскеу, Ташкент және Чикаго қалаларында жұмыс істейді, ал жақын арада Гонконг, Дубай, Нью-Йорк, Лондон және басқа да әлем қалаларында мейрамханалар ашылады.