Биылғы Наурыз мейрамы өндірістік кәсіпорында қайырымдылық шараларынан бастау алды. Игі істердің қатарын адамның бір ғана риясыз күлкісі, жылы жүзі, шынайы тілегі де толтыра алады. Осындай жақсылық жасауға асыққан Дөң тау-кен байыту комбинатының Jastar Ligasy наурыз айы басталысымен қала тұрғындарына ақ тілектер жазылған шоколадтар таратты. Хромтаулықтарға көктемгі көңіл күй сыйлаған комбинат жастары кәсіпорын басшылығы мен қызметкерлерін де ұмытпады.
ERG-дің бірнеше жылдан бері жалғасып келе жатқан маңайға мейірім төгетін «Наурыз – игі істер айы» акциясы аясында Хромтаудағы өндіріс орны көмекке мұқтаж жандарға жәрдемдесіп келеді.
Мұндағы Дөң тау-кен байыту комбинатының қызметкерлері мен Жастар лигасы ардагерлерге, жалғызбасты зейнеткерлерге және үй ауласын қардан тазалай алмайтын қарттарға қолғабыс етіп жүр.
Биыл Хромтауда қыс бойы жаумаған қар ақпан айында мол түсіп, жер үйде тұратын қарияларға ауланы тазалау қиындық туғызды. Осы сәтте Дөң тау-кен байыту комбинатының №2 жөндеу цехы, №1 ұсату-байыту фабрикасы және «Дөң» кенішінің қызметкерлері 20-ға жуық үйдің қарын күреп, тұрғындардың алғысына бөленді. Сол секілді жақында кәсіпорынға қарасты энергия цехының бұрынғы қызметкері, зейнеткер Мадина Ильясова үйінің жанында жатқан қалың қарды арнайы техникаларын алып келіп, тазартып берген осы ұжымға ұлғысын білдірді.
– Жастардың, әсіресе Дөң комбинаты қызметкерлерінің қажет кезде көмекке келгені – ардагерлерімізге үлкен демеу. Бір кездері осы кәсіпорында еңбек еткен, қазір зейнетте отырған үлкендер үшін бұл қос қуаныш. Өздері қызмет еткен ұжымның естен шығармай, әрдайым құрмет пен қолдау көрсететініне шаттанады, – деді кәсіпорынның ардагерлер кеңесінің төрайымы Наталья Латыпова.
Бұдан бөлек, наурызнама бойынша Ұлыстың ұлы күнін тойлауды бастап кеткен Дөң тау-кен байыту комбинатының ұжымын да алдымен Жастар лигасы 14 наурыз – көрісумен құттықтап барды. Кәсіпорынның цехтары бұл мейрамды ақ дастарханымен қарсы алып, думанды мерекеге айналдырды.
Ал 22 наурызда Хромтау қаласының орталық алаңында қала құраушы кәсіпорын ретінде Дөң тау-кен байыту комбинатының алты қанат киіз үйі тігілді.