ҚР Президенті Қ.К.Тоқаевтың: «2025 жыл Жұмысшы мамандықтарының жылы деп жариялансын! Қазақстан Республикасының Үкіметі Жұмысшы мамандықтарының жылын өткізу бойынша қажетті шараларды қабылдасын. Осы Жарлықтың орындалуын бақылау Қазақстан Республикасы Президентінің Әкімшілігіне жүктелсін!» деген Ақорда жарлығына қол қойылғалы жер-жерде ілгері іс-шаралар легі қаптады. Жұмысшы мамандықтарының жәрмеңкелері ұйымдастырылып, жұмысшы мамандықтарын оқытатын орта, жоғары оқу орындарына көңіл бөліне бастады. Бұл іс-шаралар легін қарапайым еңбек адамдарына беріліп жатқан толассыз марапаттар жалғай әкетті. Көптеген маңызды мәдени шаралардың атауына да аталмыш жыл арқау болуда. Іске қосылатын ипотекалық бағдарлама, еңбек нарығында сұранысқа ие мамандықтарды оқытатын текникалық және кәсіптік білім беруді трансформациялауға арналған 2025-2027 жылдарға арналған Жол картасы осының бәрі аталған жыл аясында қолға алынып жатқан шаралардың бір парасы ғана.
Осы орайда әлемдегі мұнай алпауыттарының үздік үштігіне кіретін CNPC қытайлық компаниясының ұзақ мерзімді сенімді серіктес ретінде Қазақстанда отыз жылдық тарихы бар СНПС-Ақтөбемұнайгаз АҚ компаниясына да жыл жылдағыдан ерекше басталды. Бірнеше зауыттары мен кен орындарында мыңдаған жұмысшылар жұмыс жасайтын алып компания үшін Президенттің жұмысшы мамандықтар жылын жариялауы да жақсы жаңалықтар легін жалғастыра кетті. Бұған дейін де еліміздегі маңызды мәдение, тарихи, архитектуралық құрылыстарды салуда, өңірді әлеуметтік-экономикалық қолдауда, түрлі қайырымдылық акцияларын өткізуде алдына қара салмайтын компания басшылығы жұмысшы мамандықтар жылы аясында да жолға қойылған жоспарларымен бөлісті.
«СНПС-Ақтөбемұнайгаз» АҚ бас директорының бірінші орынбасары Тахталифум Сәдуұлы бұл туралы былай дейді:
— Азаттық алған жылдардан бері елімізде жоғары білім алып, басқару қызметіне ұмтылу басымдық алғаны анық. Соның нәтижесінде жұмысшы мамандықтары бағаланбай, әсіресе жастар бұл мамандықтарға жай ғана табыс көзі ретінде қарайтын еді. Бірақ биылғы жылды ҚР Президентінің жұмысшы мамандықтар жылы деп жариялауы расымен де жұмысшы мамандықтарының әлеуметтік мәртебесінің өсуіне тікелей әсер етті деп есептеймін. Президент өз сөзінде: «Біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз! Адал әрі табанды еңбегімен табысқа жеткен адамдар қашанда құрметті, сыйлы болуы керек. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Жұмыстың жаманы жоқ, кез келген еңбек – қадірлі!», — деген еді. Осы жылмен жұмысшы мамандықтарының жаңа дәуірі басталады. Бұл қадам біз сияқты ірі компаниялардағы кадр тапшылығын түбегейлі жоюға, жастарды жұмысшы мамандықтарына тартуға тікелей мұрындық болары сөзсіз. Біздің компания бұл жылға ақпараттық тұрғыдан дайын болды. Себебі бізде бұған дейін де еңбек озаттарын, 20-30 жыл ғұмырын біздің кен орындарымызда, зауыттарымызда еңбекке арнаған жұмысшыларды, жұмысшылар династиясын, мәселен 60 жылдары еңбек жолын бастаған еңбек ардагерлерінің бүгінгі таңда немерелері де біздің компанияда еңбек етіп жүрген еңбекқор әулеттерді марапаттау маңызды шара болып есептелетін. Ондай жұмысшыларымыз туралы бұған дейін де БАҚ беттерінде жарияланымдар жарияланып, әртүрлі деңгейдегі марапаттарға ұсынылған болатын. Сонымен қатар жергілікті колледждермен, ЖОО -мен әріптестік қарым-қатынас жолға қойылған. Бұл жақсы дәстүрлер жұмысшы мамандықтар жылында одан әрі жалғасын таба бермек. Ал жалпы жұмысшы мамандықтар жылына орай компанияда өткізілетін маңызды іс-шаралар компанияның кәсіподағымен ұйымдастырылады. Не десек те, ағымдағы жылдығ «Жұмысшы мамандықтар жылы» деп жариялануына орай қоғамдағы еңбек мәдениетін қалыптастырып, жұмысшы мамандардың беделін арттыру жолында өскелең ұрпақты еңбекке баулу, олардың қарым- қабілеттерін дамытуға мүмкіндік жасау баршамыздың ортақ міндетіміз.
Еліміздегі ірі жобаларды жүзеге асыруда ұйытқы болып жүрген СНПС сияқты іргелі компаниялардағы ілгері істер өзге де стратегиялық серіктестерге үлгі болуы тиіс.
Жұлдыз Қожабекова