2024 жылы олигарх Болат Өтемұратов Алматы облысында мектеп салуға 8 млрд теңгеден аса қаржы бөлген еді. Ал биыл оның банкі жарты жылда жарнамаға соның жартысына жуығын жұмсап үлгерді, деп хабарлайды «Іскер Тілші» BesMedia-ға сілтеп.
2025 жылдың алғашқы жартысында ForteBank жарнама мен маркетингке 3,4 млрд теңге бағыттады. Бұл өткен жылдың осы кезеңімен салыстырғанда 86,8%-ға көп. Сарапшылар мұны ақпан айында басталған банктің ребрендингімен байланыстырады.
Жарты жылда 3,4 млрд теңге жұмсалғанымен, банктің қайырымдылыққа бөлген қаражаты керісінше азайды – 2024 жылдың алғашқы алты айында 2,3 млрд теңге болса, биыл небәрі 1 млрд теңге ғана.
Былтыр ForteBank пен Өтемуратов қоры Алматы облысы Есік қаласында 900 орындық мектеп салып берген. Жоба құны 8,1 млрд теңге болған.
Еске сала кетейік, шілдеде Болат Өтемұратов ForteBank-тегі үлесін арттырып, банк акцияларын сатып алуға 10,9 млрд теңге жұмсаған еді.