«Еуразиялық банк» акционерлік қоғамы Өзбекстан аумағында банктік қызмет жүргізу құқығынан айырылды. Бұл туралы елдің Орталық банкі хабарлады.
Мекеменің ресми мәліметінше, 2025 жылдың 27 тамызында өткен басқарма отырысының шешімімен банктің лицензиясы кері қайтарылған. Бұған банк жарғылық капиталының заңда белгіленген ең төменгі талаптарға сай келмеуі және банктер туралы заңнамадағы басқа да міндеттемелерді орындамауы себеп болған.
Орталық банк түсіндіргендей, «Өзбекстан Республикасының Орталық банкі туралы», «Банктер және банк қызметі туралы» заңдары мен өзге де нормативтік құжаттарға сүйене отырып, аталған қаржы ұйымын мәжбүрлі түрде тарату туралы шешім қабылданды. Сондай-ақ банкке арнайы тарату комиссиясы тағайындалды.