Қазақстан Республикасы Стратегиялық жоспарлау және реформалар агенттігі Ұлттық статистика бюросының деректеріне сәйкес, Ақтөбе облысындағы жастар саны 267 724 адамды құрайды. Оның 165 048-і қалада тұрады. Ал жастардың кәсіби өсуіне және қоғам өміріне белсенді қатысуына жастар саясаты басқармасы жағдай жасайды. Өңірдегі жастар саясаты қалай жүзеге асып жатыр? Жастар саясатындағы өзекті мәселелер қандай? Бұл сұрақтарға ақтөбелік белсенді жастар пікір білдірді.
Нормативтік-құқықтық базаны қалыптастыру, жастар бағдарламалары мен жобаларын әзірлеу. жүзеге асыру, жастарды жұмысқа орналастыруға жәрдемдесу, волонтерлік және әлеуметтік бастамаларды дамыту — жастар саясатының негізгі міндеттері. Осы тұрғыда жастардың әлеуметтенуіне, кәсіби өсуіне, жұмыс табуына көмектесетін «Бастау бизнес», «Алғашқы жұмыс орны», «Ұрпақтар келісім-шарты», «ZHAS PROJECT» жобалары дәстүрлі түрде іске асады. Жұмыссыздық деңгейін төмендету бағытында былтырдан бастап «Jumystap» әлеуметтік жобасы іске асырылуда. Алайда білім алмайтын, жұмыс істемейтін жастар жоқ емес. Ақтөбе облысының жастар саясаты мәселелері басқармасының мәліметтеріне сүйенсек, NEET санатындағы 4801 ақтөбелік жас бар. Олар — 15-34 жас аралығындағы жастар.
Томирис Бакиева: Жастарды қолдауға арналған бағдарламалар саны көбейіп келеді. Өкінішке қарай, бұл бастамалар кейде жастардың шынайы сұранысына сай келмейді немесе ол мүмкіндіктер туралы жастардың өзі мүлде бейхабар болып шығады. Яғни, ақпараттың дұрыс әрі дер кезінде жеткізілмеуі — басты мәселелердің бірі. Сонымен қатар, кейбір бағдарламалар шынайы қажеттіліктен емес, тек қағаз жүзіндегі көрсеткіштерді орындауға бағытталғанын байқаймыз. Мұндайда жастардың қызығушылығы, өмірлік мақсаты, нақты жағдайы ескерілмей, формальды саясат жүргізіліп жатады.
Тағы бір маңызды жайт — жастардың өзі де кейде белсенділік танытпайды. Қазіргі ақпарат тасқынына толы ортада олар мүмкіндік іздеп, талаптанып, жауапкершілік алуға бейім бола бермейді. Бұл да жастар саясаты мен жастар ортасының арасындағы алшақтықты арттырып отыр.
Менің ойымша, қазіргі жастар саясатына зерттеу жетіспейді. Біз нақты өңірдегі жастың «портретін» білмейміз. Оның қызығушылығы, өмір сүру салты, ақпаратты қайдан алатыны, кімге сенетіні секілді факторлар ескерілмей қалады. Қала мен ауыл жастарының жағдайы мен қажеттіліктері әртүрлі екенін ескеру қажет. Яғни, жас ерекшелігіне сай аймақтық саясат қажет.
Жастар – елдің болашағы ғана емес, қазіргі драйвері. Олар қоғамның дамуына өз үлесін қосуға дайын, тек оларға сенім, мүмкіндік және қолдау қажет.
Темірлан Жолдыбай: Жастар саясаты басқармасы біздің «Eco Madeniet» эко-волонтерлік қозғалысымызды әрқашан қолдайды. Ақтөбе облысында экологиялық мәдениетті дамытуға арналған түрлі іс-шаралар жиі өткізіледі. Мысалы, эко-плоггингтерді Нұржан Құрманғалиұлының басшылығымен «Жасыл ел» ұйымы, сондай-ақ облыстық және қалалық жастар ресурстық орталықтары ұйымдастырып тұрады.
“Таза Қазақстан” жалпыұлттық акциясы аясында да көптеген шаралар өтеді. Форматтары ойын түрінде, қызықты болғандықтан, жастардың қатысуға деген ынтасы арта түсуде. Өзім жастарға арналған гранттар мен бағдарламаларға әлі қатыспадым. Бұрын қатысуға ниеттеніп, әрекет жасап көрдім. Бірақ сәтсіз аяқталды. Сондықтан қазіргі уақытта алған ақпаратымды командаммен бөлісіп, олардың жобаларға қатысып, жаңа бастамаларды жүзеге асыруына жағдай жасап жүрмін. Менің ойымша, жастарға арналған гранттар мен бағдарламалар туралы қысқа әрі түсінікті бейнероликтер жасау маңызды. Қайда, қалай өтінім беру керектігін цифрлық форматта қарапайым әрі қолжетімді етіп ұсыну тиімді шешім болар еді.
Меніңше, жастардың белсенділігін арттыру үшін әрдайым жастардың өзімен тікелей жұмыс істеу қажет. Әр түрлі ортадан шыққан жастармен кездесу, пікірін тыңдау, идеяларын іске асыруға мүмкіндік беру маңызды. Егер тек бір адамдармен ғана жұмыс жасалса, нәтиже де өзгермейді. Ал әртүрлі көзқарастар жаңа серпіліс әкеледі.
Ботакөз Батырбаева: Жастардың дамуына мүмкіндік көп болғанымен кәсіпкерлік жағына басымырақ көңіл бөлген жөн. Неше түрлі, бағдарламалар мен гранттар бар. Бірақ осы мүмкіндіктерді жастарға ауқымды түрде жеткізе білу керек. Жастар деп атағанымызбен олардың жасы да, қызығушылығы да әр түрлі. Сондықтан жас шамаларына, қызығушылықтарына сай жұмыстар атқарылса, жастардың белсенділігі артады деп ойлаймын. Мысалы, «Jas vision» жобасы жастардың белсенділігін арттыруға, өзін-өзі басқару жүйесін құруға бағытталған. Осындай жастардың белсенділігін арттыратын жобаларды аудан ішінде өткізу жоспарда бар.
