Ақтөбе облысы полиция департаментінің Киберқылмысқа қарсы іс-қимыл басқармасының қызметкерлері интернет алаяқтық жасады деген күдікпен үш ер адамды ұстады.
Полиция мәліметінше, күдіктілер танымал интернет-платформаларда жалған хабарландырулар жариялап, азаматтарды алдап, алдын ала төлем алған. Нәтижесінде бес адам — Ақтөбе облысының тұрғындары, ал қалған жәбірленушілер — Астана мен Алматы қалаларының тұрғындары.
Жедел-іздестіру шаралары барысында полицейлер күдіктілердің жеке басын және жүріп-тұру орындарын анықтап, барлығын Алматы қаласында ұстады.
Ұсталғандардың екеуі — Алматы облысының 19 жастағы және 22 жастағы тұрғындары. Бірі пәтер жалға беремін деп жалған хабарландырулар жариялаған, екіншісі жүргізуші куәлігін жасаймын деп уәде берген. Екеуі де алдын ала төлем алып, кейін байланыс түзбеген.
Үшінші күдікті — Батыс Қазақстан облысының тұрғыны. Ол да онлайн-сауда алаңдарында ұқсас жалған хабарландырулар жариялап, азаматтардың ақшасын заңсыз иеленген.
Барлық жағдайларда күдіктілер жәбірленушілермен интернет пен мессенджерлер арқылы байланысқан.
Қазіргі уақытта аталған деректер бойынша Қазақстан Республикасының Қылмыстық кодексінің 190-Бабы («Алаяқтық») бойынша сотқа дейінгі тергеу амалдары жүргізілуде. Сонымен қатар, полицейлер күдіктілердің басқа өңірлерде осындай қылмыстарға қатысы бар-жоғын тексеруде.
Ақтөбе облысы полиция департаменті азаматтарды онлайн-сауда мен қызметтерді пайдалану кезінде сақ болуға шақырады: бейтаныс адамдарға ақша аудармаңыздар және интернет-та жарияланған хабарландырулардың шынайылығын мұқият тексеріңіздер.