АҚШ президенті Дональд Трамп пен Қытай төрағасы Си Цзиньпиннің Пусанда өткен кездесуі 1 сағат 40 минутқа созылды. Әлем назарын аударған келіссөз Оңтүстік Корея ӘӘК авиабазасында жабық форматта өтті, деп хабарлайды Tilshinews.kz NBC News агенттігіне сілтеме жасап.
Кездесу алдында қос лидер екі елдің туының алдында қол алысып, жылы шырай танытты.
Трамп Сиді «ұзақ жылғы досым» деп атап, Қытайды «ұлы ел, ал оның көшбасшысы — ұлы тұлға» деп сипаттады.
«Біз көптеген мәселелер бойынша келісімге келдік, тағы бірнеше бағыт бойынша дәл қазір шешім қабылдауға дайынбыз», — деді Трамп.
Си Цзиньпин өз кезегінде Пекин мен Вашингтон арасындағы қарым-қатынас тұрақты екенін атап өтіп, елдер «бірлесіп, дұрыс бағыттан айнымай алға жылжи алады» деді.
Келіссөздің жабық бөлігі
Кездесу Кимхэ әуежайының маңындағы авиабазада өтті. Трамп делегациясына АҚШ мемлекеттік хатшысы Марко Рубио, Қаржы министрі Скотт Бессент және Сауда өкілі Джеймисон Грир кірді.
Ресми мәліметтер жария етілмегенімен, дереккөздердің айтуынша, тараптар сауда қатынастары, ядролық қауіпсіздік және аймақтық тұрақтылық мәселелерін талқылады. Сарапшылардың пайымдауынша, бұл кездесу АҚШ пен Қытай арасындағы сауда бітімін нақтылаудың белгісі болуы мүмкін.
Ядролық сынақтарға қатысты мәлімдеме
Пусан сапарына дейін Трамп АҚШ Қорғаныс министрлігіне ядролық қару сынақтарын қайта бастауға бұйрық бергенін жариялаған болатын.
«Басқа елдердің сынақ бағдарламаларына байланысты біз де өзіміздің сынақтарымызды тең жағдайларда қайта бастаймыз», — деп жазды ол Truth Social платформасында.
Бұл мәлімдеме кездесудің алдында жасалғандықтан, келіссөз атмосферасын күрделендіруі мүмкін деген пікірлер айтылды.
Сарапшылар не дейді
Халықаралық дағдарыс тобының аға кеңесшісі Али Уайн кездесуден үлкен өзгерістер күтпеу керектігін айтты:
«Басты нәтиже — диалогтың өзінде. АҚШ пен Қытай бір-бірінің экономикасына зиян келтіре алатынын көрсетті, енді осы өзара тәуелділікті тұрақтандыру үшін пайдалану маңызды», — деді ол.