Биыл қараша айында e-Qazyna.kz веб-порталында OrtaBilim ақпараттық қызметі іске қосылды. Жүйе білім алушылар саны мен контингентін, рұқсат құжаттарының болуын және басқа да деректерді автоматты тексеру арқылы бақылауға мүмкіндік береді.
Қаржы министрлігі мемлекеттік тапсырыс алатын жекеменшік мектептерді қаржыландыру кезінде көптеген заңбұзушылықтарды анықтады. 745 мекемеден 155-і кірісін толық көрсетпеген, ал цифрландырылған 427 мектептің шамамен 30%-ы өз қызмет түріне сәйкес жұмыс істемейді.
Сонымен қатар, 64 мектепте оқушылар саны жобалық қуаттан екі есе асып кеткен. Мысалы, Алматы облысындағы жобалық қуаты 60 адамға есептелген жекеменшік мектепте 702 оқушы тіркелген. Астанада 241 оқушыға арналған мектептің құжаттарында 1003 адам көрсетілген.
Жекеменшік мектептерде жалған мұғалімдер мен қосарланған қаржыландыру фактілері де тіркелді.
Жаңа сервис білім беру саласындағы барлық ақпараттық жүйелерді біріктіріп, мектептер мен мұғалімдерге жүктеме талаптарының сәйкестігін бақылауға, орынсыз шығындарды азайтуға және бюджет жүктемесін төмендетуге мүмкіндік береді.
«Жүргізілген тексеру жекеменшік мектептерді қаржыландыруда заңбұзушылықтарды көрсетті. Мемлекет кейде жоқ оқушылар үшін ақша төлеп отыр. Бұл нарықта заңсыз индустрия қалыптасты. Келесі қаржыландыру жылынан бастап тәртіп толық орнатылуы тиіс. Бірде-бір мемлекеттік теңге шенеуніктердің қалтасына түспеуі керек», — деді Олжас Бектенов.