Атырау облысының прокуратурасы ерекше тәрбие сағатын өткізді. Олар колледж қабырғасындағы жастарға дәріс оқудың орнына, нағыз сот процесін тікелей эфирде көрсетті. Төрт бірдей жоғары колледждің 2 мыңға жуық студенті онлайн қосылып, қылмыскерлердің тағдыры қалай шешілетінін бақылады, деп хабарлайды «Тілші» Бас прокуратура баспасөз қызметіне сілтеп.
Бұл шараны прокуратура кәмелетке толмағандардың істері жөніндегі мамандандырылған ауданаралық сотпен бірлесіп ұйымдастырды. Мақсат – жастарға «қылмыстың соңы не болатынын» сөзбен емес, нақты іспен, көз алдарында дәлелдеу.
Экранның арғы бетіндегі сот орындығында бірден 10 адам отырды. Олардың біреуі – әлі кәмелетке толмаған жасөспірім. Тергеу барысында айыпталушылардың топ болып бұзақылық жасағаны және адам денсаулығына қасақана орташа ауырлықтағы зиян келтіргені дәлелденді. Судья жиналған дәлелдерді негізге ала отырып, оларды кінәлі деп таныды. Нәтижесінде сотталушыларға үш жылдан алты жылға дейінгі мерзімге бас бостандығын шектеу жазасы тағайындалды.
Ұйымдастырушылар мұндай ашық процестер жастардың құқықтық мәдениетін қалыптастыруға көмектеседі деп санайды. Студенттер сот залындағы ауыр атмосфераны сезініп, бір ғана қателік өмірді қалай өзгертетінін түсінді. Прокуратура өкілдері жастарды заң талаптарын қатаң сақтауға шақырды. Құқық қорғаушылар қоғамда бұзақылыққа қарсы «нөлдік төзімділік» қағидасын ұстану керектігін ескертті.