«Кселл» АҚ (Kcell және activ брендтері) абоненттермен өзара байланысты автоматтандыруға арналған интеллектуалды жасанды интеллект (ЖИ) шешімін іске қосты. Жаңа жүйе тарифтер мен қызметтер туралы ақпаратты жедел әрі дәл жеткізуге, клиенттердің жеке қызығушылықтарын ескеруге және қалаусыз байланыстар санын азайтуға мүмкіндік береді, деп хабарлайды Isker Tilshi.
Компанияның хабарлауынша, бұл шешім клиенттердің өзгеріп отырған сұраныстарына жауап ретінде әзірленген. Жоба машиналық оқыту технологиялары, үлкен тілдік модельдер және Big Data негізінде жүзеге асырылған. Қазіргі таңда абоненттер ақпаратты мазалайтын қоңыраулар мен қайталанатын ұсыныстар арқылы емес, уақтылы, нақты және түсінікті форматта алуды қалайды.
«Біз жаппай қоңырау шалудан әдейі бас тартып, интеллектуалды диалог форматына көштік. Жүйе сөйлесу контекстіне бейімделіп, клиентке тек шынымен өзекті болуы мүмкін ұсыныстарды ұсынады», — деді «Кселл» АҚ Big Data және клиенттік құндылықты басқару департаментінің басшысы Асқар Дүйшеналиев.
Жобаның негізінде тәулік бойы жұмыс істейтін және күн сайын мыңдаған абонентпен 24/7 режимінде байланыс орнататын интеллектуалды роботтандырылған қоңырау жүйесі бар. ЖИ-шешімнің ауқымдалатын архитектурасының арқасында бүгінде роботтандырылған кампаниялар Kcell-дің белсенді абоненттік базасының 23,1%-ын қамтып отыр.
Ішкі талдау құралдары коммуникациялық сценарийлерді нақты уақыт режимінде жедел түзетуге мүмкіндік береді. Ал интеллектуалды алгоритмдер әңгіме барысында диалогты бейімдеп, клиентпен байланысты барынша түсінікті әрі дәл жүргізуге жағдай жасайды.
Жобаны іске асыру барысында Kcell технологиялық серіктес ретінде CybernetAI компаниясын таңдады. Бұл шешімді қолдану маркетингтік кампанияларды іске қосу уақытын қысқартып, абоненттермен өзара әрекеттесу тиімділігін арттырған. Нәтижесінде ЖИ-кампаниялар аясындағы сатылым өсімі 15,5%-ға жетіп, орташа конверсия деңгейі 10,7% болды.
Сонымен қатар, Kcell компаниясында техникалық командалардың қатысуынсыз коммуникация сценарийлерін өз бетінше құруға және өзгертуге мүмкіндік беретін ЖИ-интерфейс енгізілуде. Бұл клиент қажеттіліктеріндегі өзгерістерге жедел әрекет етуге және интеллектуалды коммуникацияларды кең көлемде қолдануға жол ашады.